परिवर्तित गोपनीयता सर्तका कारण आलोचित बनेको मेसेजिङ एप ह्वाट्सएपले सेवा सर्तमा गरिएको आफ्नो विवादास्पद परिवर्तनलाई अघि बढाउने भएको छ । तर यस विषयमा प्रयोगकर्तालाई सूचित गर्ने तरिकामा चाहिँ फरकपना ल्याउँदैछ ।
प्रयोगकर्तालाई एप प्रयोगका लागि डाटा शेयर गर्नुपर्ने सर्त मान्नैपर्ने नयाँ नीतिलाई बाध्यकारी बनाइएको घोषणा गत जनवरीमा ह्वाट्सएपले गरेको थियो । त्यसयता दशौँ लाख प्रयोगकर्ताले ह्वाट्सएप छाडेर अन्य प्रतिस्पर्धी मेसेजिङ एपहरु डाउनलोड गरिसकेका छन् ।
उक्त घटनाबाट चिन्तित बनेको ह्वाट्सएपले गलत सूचनाका कारण पीडित बनेको टिप्पणी गरेको थियो । त्यसैले गोपनीयता नीति सम्बन्धी प्रयोगका सर्तमा गरिएको परिवर्तनलाई सही ढंगमा प्रतिविम्बित गरेर आम प्रयोगकर्तालाई सही सूचना प्रदान गर्ने नयाँ तरिका अपनाउन लागेको उसले जनाएको छ ।
यसअघि ह्वाट्सएपले प्रयोगकर्तालाई नीति परिवर्तनको सूचना दिँदा चेतावनीयुक्त पदावली भएको मेसेज पठाएको थियो । त्यसले प्रयोगकर्तालाई त्रसित बनाएको थियो । ह्वाट्सएपले प्रयोगकर्ताका सबै डाटाहरु फेसबुकसँग सेयर गर्छ भन्ने आम प्रयोगकर्ताको डर थियो ।
तर वास्तविक रुपमा ह्वाट्सएपको नयाँ नीतिपछि पनि फेसबुकसँग गरिने डाटा सेयरको मामिलामा भएको परिवर्तन निकै कम छ । वास्तवमा त्यसअघि पनि सबै प्रयोगकर्ताले ह्वाट्सएपका डाटा शेयर गर्ने सर्त पालना गरिसकेका हुन्थे ।
नयाँ परिवर्तनप्रति प्रयोगकर्तामा देखिएको आशंका हटाउनका लागि ह्वाट्सएपले आगामी हप्ताहरुबाट एपभित्रै ब्यानर अलर्ट प्रस्तुत गर्नेछ ।
त्यसले प्रयोगकर्तालाई ह्वाट्सएपको नयाँ अपडेट के हो र यसबाट कुनकुन कुरा परिवर्तन हुन्छन् अनि के कुरा यथावत रहन्छ ? भन्ने तथ्य बुझ्न सहयोग गर्नेछ ।
साथै ह्वाट्सएपको स्टाटस खण्डमा नयाँ अपडेटसँग सम्बन्धित जानकारी सम्बद्ध सन्देशहरु प्रेसित गरिन्छ । आगामी मे १५ देखि नयाँ अपडेट लागू हुने बताइएको छ ।
ह्वाट्सएपका अनुसार फेसबुकसँग सेयर गरिने डाटाहरुमा मेसेज, ग्रुप तथा कलिंग विवरणहरु समावेश हुनेछैनन् ।
ह्वाट्सएपले प्रयोगकर्ताका आईपी एड्रेस, फोन नम्बर सम्बन्धी विवरण तथा उक्त प्लाटर्फमबाट गरिएको किनमेलका विवरणचाहिँ यसअघि देखि नै फेसबुकसँग सेयर गर्दै आएको छ । यद्यपि फरक गोपनीयता कानुन रहेको युरोपेली युनियन सम्बद्ध मुलुकहरु तथा बेलायतमा चाहिँ ह्वाट्सएप प्रयोगकर्ताका यस्ता डाटाहरु समेत फेसबुकमा सेयर हुँदैनन् ।
